Hulagway sa Kagahapon

Dili ko gayud hikalimtan ning gabhiona nga nakita nako akong karaan nga panagway sa facebook. Nakita ko ang kabulingit sa akong panagway, ug kanang ginaingon sa banyagang ingles na "no taste" walay taste ug kun sa bakla pa "chaka". Duyog sa akong mga higala sa eskwela nahinumduman ko ang mga kagahapon nga milabay. Malipayon kini ug puno sa agik-ik ug kaboang.

Sauna kami mga bata-bata pa ug mahilig kami mosuway ug mga butang nga ginadili sama sa pag-inom sa ilimnon nga mkalipong, tabako, ug pagkiat-kiat sa kagabhion. Tuod man hantod karun wala koy mga pagmahay. Malipayon gayud ang akong kinabuhi sa kolehiyo, puno kini ug paglaom na mopasar sa tagsa tagsa ka klase maskin pa tuod nga mga absenot kami dili mosulod sa clase o mag-cutting class, ug mahilig maglipay-lipay sa baylihan (disco in english) matag gabie.

Aduna akoy mga higala nga nagdala ug kaayuhan ug kapintasan sa panahon nga ako gaeskwela pa. Apan ako wala nahulog sa kadautan kay wala ako biya-e sa akong mga suod nga higala nga sukad pa kaniadto giubanan ako sa dalan sa ginatawag natong kinabuhi. Nasayod kamu kun kinsa kamo.

Bug-os nga malipayon ako nga nakita kining mga hulagway. Apan gibati akog kasubo kay nagka tibulaag na kami karung panahona. Hinaot unta nga itugot sa gamhanang Diyos nga magkahiusa na usab kami ug saluhan ang kalipay sa nilabay namong kagahapon.